ਬਰਲਿਨ/ਅੰਮ੍ਰਿਤਸਰ:
ਜਰਮਨੀ ਦੇ ਸ਼ਹਿਰ ਡਿਉਸਵਰਗ (ਮੂਰਜ਼) ਦੇ ਗੁਰਦੁਆਰਾ ਸਾਹਿਬ ਦੀ ਪਰਕਰਮਾ ਵਿੱਚ ਬੀਤੇ ਦਿਨੀਂ ਜੋ ਮੰਦਭਾਗਾ ਘਟਨਾਕ੍ਰਮ ਵਾਪਰਿਆ, ਉਸ ਨੇ ਨਾ ਸਿਰਫ਼ ਪੱਛਮੀ ਮੁਲਕਾਂ ਵਿੱਚ ਵਸਦੇ ਸਿੱਖਾਂ ਦੀ ਸਾਖ਼ ਨੂੰ ਸੱਟ ਮਾਰੀ ਹੈ, ਸਗੋਂ ਮਨੁੱਖੀ ਅਜ਼ਮਤ ਦੇ ਪ੍ਰਤੀਕ ‘ਦਸਤਾਰ’ ਦੇ ਗੌਰਵ ਨੂੰ ਵੀ ਮੰਡੀ ਦੀ ਧੂੜ ਵਿੱਚ ਰੋਲ ਦਿੱਤਾ ਹੈ। ਗੁਰੂ ਘਰ ਦੀਆਂ ਗੋਲਕਾਂ ਅਤੇ ਪ੍ਰਬੰਧਕੀ ਚੌਧਰ ਦੀ ਲਾਲਸਾ ਹੇਠ ਹੋਈ ਇਸ ਹਿੰਸਕ ਝੜਪ ਨੇ ਸਾਬਤ ਕਰ ਦਿੱਤਾ ਹੈ ਕਿ ਅਸੀਂ ਅੱਜ ਵੀ ‘ਮਨ ਨੀਵਾਂ ਮਤ ਉੱਚੀ’ ਦੇ ਸੰਕਲਪ ਤੋਂ ਕੋਹਾਂ ਦੂਰ ਖੜ੍ਹੇ ਹਾਂ।
ਇਸ ਦੁਖਦਾਈ ਘਟਨਾ 'ਤੇ ਡੂੰਘੀ ਚਿੰਤਾ ਅਤੇ ਰੋਸ ਦਾ ਪ੍ਰਗਟਾਵਾ ਕਰਦਿਆਂ ਇੰਡੀਅਨ ਓਵਰਸੀਜ਼ ਕਾਂਗਰਸ (IOC) ਜਰਮਨੀ ਦੇ ਪ੍ਰਧਾਨ ਸ. ਬਲਵਿੰਦਰ ਸਿੰਘ ਗੁਰਦਾਸਪੁਰੀਆ ਨੇ ਤਿੱਖਾ ਪ੍ਰਤੀਕਰਮ ਦਿੱਤਾ ਹੈ। ਉਨ੍ਹਾਂ ਇਸ ਨੂੰ ਸਿੱਖੀ ਰਵਾਇਤਾਂ ਦਾ ਘਾਣ ਕਰਾਰ ਦਿੰਦਿਆਂ ਕਿਹਾ ਕਿ ਜਿਸ ਪਵਿੱਤਰ ਅਸਥਾਨ 'ਤੇ ਅਸੀਂ ‘ਸਰਬੱਤ ਦਾ ਭਲਾ’ ਮੰਗਣ ਜਾਂਦੇ ਹਾਂ, ਜੇਕਰ ਉੱਥੇ ਹੀ ਕ੍ਰਿਪਾਨਾਂ ਮਿਆਨੋਂ ਬਾਹਰ ਆ ਜਾਣ ਅਤੇ ਪੱਗਾਂ ਪੈਰਾਂ ਹੇਠ ਰੁਲਣ, ਤਾਂ ਇਹ ਸਾਡੇ ਲਈ ਸਵੈ-ਪੜਚੋਲ ਦਾ ਵਿਸ਼ਾ ਹੈ।
ਗੁਰਦਾਸਪੁਰੀਆ ਨੇ ਕਿਹਾ ਕਿ ਪੱਗ ਸਿਰਫ਼ ਪੰਜ ਮੀਟਰ ਦਾ ਕੱਪੜਾ ਨਹੀਂ, ਸਗੋਂ ਇਹ ਸਿੱਖ ਦੇ ਸਵੈ-ਮਾਣ ਅਤੇ ਗੁਰੂ ਵੱਲੋਂ ਦਿੱਤੀ ਬਖਸ਼ਿਸ਼ ਹੈ। ਇਸ ਦੀ ਬੇਅਦਬੀ ਕਿਸੇ ਵੀ ਕੀਮਤ 'ਤੇ ਅਸਵੀਕਾਰਯੋਗ ਹੈ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਅਜਿਹੇ ਅਨਸਰ ਕੌਮ ਦੇ ਅਕਸ ਨੂੰ ਵਿਸ਼ਵ ਪੱਧਰ 'ਤੇ ਧੁੰਦਲਾ ਕਰ ਰਹੇ ਹਨ।
ਇੰਡੀਅਨ ਓਵਰਸੀਜ਼ ਕਾਂਗਰਸ ਦੇ ਪ੍ਰਧਾਨ ਨੇ ਧਾਰਮਿਕ ਅਦਾਰਿਆਂ ਵਿੱਚ ਵਧ ਰਹੀ ਹਿੰਸਾ 'ਤੇ ਚਿੰਤਾ ਪ੍ਰਗਟਾਉਂਦਿਆਂ ਕਿਹਾ ਕਿ ਕਾਂਗਰਸ ਪਾਰਟੀ ਹਮੇਸ਼ਾ ਧਰਮ-ਨਿਰਪੱਖਤਾ ਅਤੇ ਧਾਰਮਿਕ ਸੁਤੰਤਰਤਾ ਦੀ ਮੁਦਈ ਰਹੀ ਹੈ, ਪਰ ਹਿੰਸਾ ਦਾ ਕੋਈ ਧਰਮ ਨਹੀਂ ਹੁੰਦਾ। ਉਨ੍ਹਾਂ ਸੰਗਤ ਨੂੰ ਅਪੀਲ ਕੀਤੀ ਕਿ ਗੁੱਸੇ ਅਤੇ ਹੰਕਾਰ ਨੂੰ ਤਿਆਗ ਕੇ ਗੁਰੂ ਦੇ ਦਰਸਾਏ ਮਾਰਗ 'ਤੇ ਚੱਲਿਆ ਜਾਵੇ ਤਾਂ ਜੋ ਭਵਿੱਖ ਵਿੱਚ ਅਜਿਹੀਆਂ ਘਟਨਾਵਾਂ ਨਾਲ ਕੌਮ ਨੂੰ ਸ਼ਰਮਸਾਰ ਨਾ ਹੋਣਾ ਪਵੇ।