ਨਵੀਂ ਦਿੱਲੀ/ਕਿਨਸ਼ਾਸਾ:
ਡੈਮੋਕ੍ਰੇਟਿਕ ਰੀਪਬਲਿਕ ਆਫ਼ ਕਾਂਗੋ ਦੇ ਪੂਰਬੀ ਸੂਬੇ ਉੱਤਰੀ ਕਿਵੂ ਵਿੱਚ ਸਥਿਤ ਰੂਬਾਯਾ ਕੋਲਟਨ ਖਾਣ ਵਿੱਚ ਬੁੱਧਵਾਰ ਨੂੰ ਵਾਪਰੇ ਭਿਆਨਕ ਜ਼ਮੀਨ ਖਿਸਕਣ ਹਾਦਸੇ ਵਿੱਚ 200 ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਗਈ। ਹਾਦਸੇ ਦੌਰਾਨ ਖਾਨ ਵਿੱਚ ਕੰਮ ਕਰ ਰਹੇ ਮਜ਼ਦੂਰਾਂ ਦੇ ਨਾਲ-ਨਾਲ ਨੇੜਲੇ ਇਲਾਕਿਆਂ ਦੇ ਬੱਚੇ ਅਤੇ ਬਾਜ਼ਾਰ ਵਿੱਚ ਸਾਮਾਨ ਵੇਚਣ ਵਾਲੀਆਂ ਔਰਤਾਂ ਵੀ ਮਲਬੇ ਹੇਠ ਦੱਬ ਗਈਆਂ।
ਸਥਾਨਕ ਪ੍ਰਸ਼ਾਸਨ ਅਨੁਸਾਰ, ਮੀਂਹਾਂ ਦੇ ਮੌਸਮ ਕਾਰਨ ਜ਼ਮੀਨ ਕਾਫ਼ੀ ਕਮਜ਼ੋਰ ਹੋ ਚੁੱਕੀ ਸੀ। ਇਸ ਦੌਰਾਨ ਖਾਨ ਦਾ ਇੱਕ ਵੱਡਾ ਹਿੱਸਾ ਅਚਾਨਕ ਢਹਿ ਗਿਆ, ਜਿਸ ਨਾਲ ਭੂਚਾਲ ਵਰਗੀ ਆਵਾਜ਼ ਸੁਣਾਈ ਦਿੱਤੀ ਅਤੇ ਇਲਾਕੇ ਵਿੱਚ ਦਹਿਸ਼ਤ ਫੈਲ ਗਈ। ਬਚਾਅ ਟੀਮਾਂ ਵੱਲੋਂ ਮਲਬਾ ਹਟਾਉਣ ਅਤੇ ਫਸੇ ਲੋਕਾਂ ਨੂੰ ਬਾਹਰ ਕੱਢਣ ਦੀ ਕੋਸ਼ਿਸ਼ ਜਾਰੀ ਹੈ, ਪਰ ਭਾਰੀ ਮਲਬੇ ਅਤੇ ਅਸੁਰੱਖਿਅਤ ਹਾਲਾਤ ਕਾਰਨ ਰਾਹਤ ਕਾਰਜ ਮੁਸ਼ਕਲ ਬਣੇ ਹੋਏ ਹਨ।
ਸੂਤਰਾਂ ਮੁਤਾਬਕ, ਘੱਟੋ-ਘੱਟ 20 ਗੰਭੀਰ ਜ਼ਖਮੀ ਲੋਕਾਂ ਨੂੰ ਹਸਪਤਾਲਾਂ ਵਿੱਚ ਦਾਖਲ ਕਰਵਾਇਆ ਗਿਆ ਹੈ, ਜਦਕਿ ਅਸਲ ਮੌਤਾਂ ਦੀ ਗਿਣਤੀ ਹੋਰ ਵੱਧ ਸਕਦੀ ਹੈ। ਇਕ ਗਵਰਨਰ ਸਲਾਹਕਾਰ ਨੇ ਦੱਸਿਆ ਕਿ ਹੁਣ ਤੱਕ 227 ਮੌਤਾਂ ਦੀ ਪੁਸ਼ਟੀ ਕੀਤੀ ਜਾ ਚੁੱਕੀ ਹੈ, ਪਰ ਖੋਜ ਕਾਰਜ ਪੂਰੇ ਹੋਣ ਤੋਂ ਬਾਅਦ ਅੰਕੜੇ ਵਧ ਸਕਦੇ ਹਨ।
ਰੂਬਾਯਾ ਖਾਨ ਦੁਨੀਆ ਦੇ ਕੋਲਟਨ ਉਤਪਾਦਨ ਦਾ ਲਗਭਗ 15 ਫੀਸਦੀ ਹਿੱਸਾ ਪੈਦਾ ਕਰਦੀ ਹੈ। ਕੋਲਟਨ ਦੀ ਵਰਤੋਂ ਮੋਬਾਈਲ ਫੋਨ, ਕੰਪਿਊਟਰ, ਏਰੋਸਪੇਸ ਅਤੇ ਹੋਰ ਉੱਚ-ਤਕਨੀਕੀ ਉਪਕਰਣਾਂ ਵਿੱਚ ਹੁੰਦੀ ਹੈ। ਹਾਲਾਂਕਿ, ਇੱਥੇ ਕੰਮ ਕਰਨ ਵਾਲੇ ਲੋਕ ਘੱਟ ਮਜ਼ਦੂਰੀ ਅਤੇ ਬਿਨਾਂ ਯੋਗ ਸੁਰੱਖਿਆ ਉਪਕਰਣਾਂ ਦੇ ਕੰਮ ਕਰਨ ਲਈ ਮਜਬੂਰ ਹਨ।
ਇਹ ਹਾਦਸਾ ਪੂਰਬੀ ਕਾਂਗੋ ਵਿੱਚ ਅਸੁਰੱਖਿਅਤ ਮਾਈਨਿੰਗ, ਗਰੀਬੀ ਅਤੇ ਲਗਾਤਾਰ ਚੱਲ ਰਹੇ ਸੰਘਰਸ਼ ਦੀ ਕੜੀ ਤਸਵੀਰ ਪੇਸ਼ ਕਰਦਾ ਹੈ, ਜਿੱਥੇ ਮਨੁੱਖੀ ਜਾਨਾਂ ਦੀ ਸੁਰੱਖਿਆ ਨੂੰ ਅਕਸਰ ਨਜ਼ਰਅੰਦਾਜ਼ ਕੀਤਾ ਜਾਂਦਾ ਹੈ।