ਚੰਡੀਗੜ੍ਹ:
ਪੋਸਟ ਗ੍ਰੈਜੂਏਟ ਇੰਸਟੀਚਿਊਟ ਆਫ਼ ਮੈਡੀਕਲ ਐਜੂਕੇਸ਼ਨ ਐਂਡ ਰਿਸਰਚ (PGIMER), ਚੰਡੀਗੜ੍ਹ ਦੇ ਡਾਕਟਰਾਂ ਵੱਲੋਂ ਸੈਲਫੋਸ (ਐਲੂਮੀਨੀਅਮ ਫਾਸਫਾਈਡ) ਜ਼ਹਿਰ ਦੇ ਇਲਾਜ ਸਬੰਧੀ ਕੀਤੀ ਗਈ ਇੱਕ ਅਹਿਮ ਕਲੀਨਿਕਲ ਖੋਜ ਨੂੰ ਅੰਤਰਰਾਸ਼ਟਰੀ ਪੱਧਰ ‘ਤੇ ਮਾਨਤਾ ਮਿਲੀ ਹੈ। ਇਸ ਅਧਿਐਨ ਨੇ ਸਾਬਤ ਕੀਤਾ ਹੈ ਕਿ ਇਨਟਰਾਵੇਨ ਲਿਪਿਡ ਇਮਲਸ਼ਨ ਥੈਰੇਪੀ ਇਸ ਘਾਤਕ ਜ਼ਹਿਰ ਦੇ ਮਾਮਲਿਆਂ ਵਿੱਚ ਜਾਨਾਂ ਬਚਾਉਣ ਵਿੱਚ ਪ੍ਰਭਾਵਸ਼ਾਲੀ ਹੋ ਸਕਦੀ ਹੈ।
PGIMER ਦੇ ਇੰਟਰਨਲ ਮੈਡੀਸਨ ਵਿਭਾਗ ਵੱਲੋਂ ਕੀਤਾ ਗਿਆ ਇਹ ਅਧਿਐਨ ਦੁਨੀਆ ਦਾ ਪਹਿਲਾ ਕਲੀਨਿਕਲ ਅਧਿਐਨ ਮੰਨਿਆ ਜਾ ਰਿਹਾ ਹੈ, ਜੋ ਸੈਲਫੋਸ ਜ਼ਹਿਰ ਦੇ ਇਲਾਜ ਲਈ ਲਿਪਿਡ ਇਮਲਸ਼ਨ ਥੈਰੇਪੀ ਦੇ ਪ੍ਰਭਾਵ ਨੂੰ ਵਿਗਿਆਨਕ ਤੌਰ ‘ਤੇ ਦਰਸਾਉਂਦਾ ਹੈ। ਇਸ ਖੋਜ ਦੇ ਨਤੀਜੇ ਅੰਤਰਰਾਸ਼ਟਰੀ ਤੌਰ ‘ਤੇ ਪ੍ਰਸਿੱਧ ਮੈਡੀਕਲ ਜਰਨਲ European Review of Medical and Pharmacological Sciences ਵਿੱਚ ਪ੍ਰਕਾਸ਼ਿਤ ਹੋਏ ਹਨ।
ਇਹ ਅਧਿਐਨ ਪ੍ਰੋ. ਸੰਜੇ ਜੈਨ, ਡੀਨ (ਅਕਾਦਮਿਕ) ਅਤੇ ਇੰਟਰਨਲ ਮੈਡੀਸਨ ਵਿਭਾਗ ਦੇ ਮੁਖੀ ਦੀ ਦੇਖ-ਰੇਖ ਹੇਠ ਕੀਤਾ ਗਿਆ। ਖੋਜ ਦੀ ਅਗਵਾਈ ਡਾ. ਮਨਦੀਪ ਸਿੰਘ ਭਾਟੀਆ, ਐਸੋਸੀਏਟ ਪ੍ਰੋਫੈਸਰ, ਨੇ ਕੀਤੀ, ਜਦਕਿ ਡਾ. ਸੌਰਭ ਚੰਦਰਭਾਨ ਸ਼ਾਰਦਾ ਸਹਿ-ਜਾਂਚਕਰਤਾ ਰਹੇ। ਅਧਿਐਨ PGIMER ਦੇ ਮੈਡੀਕਲ ਐਜੂਕੇਸ਼ਨ ਐਂਡ ਰਿਸਰਚ ਸੈੱਲ (MERC) ਦੇ ਸਹਿਯੋਗ ਨਾਲ ਸੰਪੰਨ ਹੋਇਆ।
ਖੋਜ ਦੌਰਾਨ ਪਾਇਆ ਗਿਆ ਕਿ ਜਿਨ੍ਹਾਂ ਮਰੀਜ਼ਾਂ ਨੂੰ ਮਿਆਰੀ ਇਲਾਜ ਦੇ ਨਾਲ-ਨਾਲ ਲਿਪਿਡ ਇਮਲਸ਼ਨ ਥੈਰੇਪੀ ਦਿੱਤੀ ਗਈ, ਉਨ੍ਹਾਂ ਵਿੱਚ ਮੌਤ ਦਰ ਵਿੱਚ ਕਾਫ਼ੀ ਕਮੀ ਆਈ। ਗੰਭੀਰ ਮੈਟਾਬੋਲਿਕ ਐਸਿਡੋਸਿਸ ਤੇਜ਼ੀ ਨਾਲ ਹੱਲ ਹੋਈ, ਬਲੱਡ ਪ੍ਰੈਸ਼ਰ ਅਤੇ ਦਿਲ ਦੀ ਕਾਰਗੁਜ਼ਾਰੀ ਵਿੱਚ ਸੁਧਾਰ ਦੇਖਿਆ ਗਿਆ ਅਤੇ ਸਦਮੇ ਜਾਂ ਦਿਲ ਦੀਆਂ ਪੇਚੀਦਗੀਆਂ ਵਾਲੇ ਮਰੀਜ਼ਾਂ ਦੇ ਨਤੀਜੇ ਕਾਫ਼ੀ ਬਿਹਤਰ ਰਹੇ।
ਡਾਕਟਰਾਂ ਅਨੁਸਾਰ, ਇਸ ਥੈਰੇਪੀ ਦੀ ਸਭ ਤੋਂ ਵੱਡੀ ਖਾਸੀਅਤ ਇਹ ਹੈ ਕਿ ਇਹ ਕਿਫਾਇਤੀ, ਆਸਾਨੀ ਨਾਲ ਉਪਲਬਧ ਅਤੇ ਵਰਤੋਂਯੋਗ ਹੈ। ਜ਼ਿਲ੍ਹਾ ਅਤੇ ਪੇਂਡੂ ਹਸਪਤਾਲਾਂ ਵਿੱਚ ਵੀ ਇਹ ਇਲਾਜ ਮੌਜੂਦ ਹੈ, ਜਿਸ ਕਾਰਨ ਖੇਤੀਬਾੜੀ ਖੇਤਰਾਂ ਵਿੱਚ—ਜਿੱਥੇ ਸੈਲਫੋਸ ਜ਼ਹਿਰ ਦੇ ਮਾਮਲੇ ਜ਼ਿਆਦਾ ਹਨ—ਇਹ ਹਜ਼ਾਰਾਂ ਜਾਨਾਂ ਬਚਾਉਣ ਵਿੱਚ ਮਦਦਗਾਰ ਸਾਬਤ ਹੋ ਸਕਦੀ ਹੈ।
ਪੰਜਾਬ, ਹਰਿਆਣਾ ਅਤੇ ਉੱਤਰ ਪ੍ਰਦੇਸ਼ ਵਰਗੇ ਰਾਜਾਂ ਵਿੱਚ ਅਨਾਜ ਸੰਭਾਲ ਲਈ ਐਲੂਮੀਨੀਅਮ ਫਾਸਫਾਈਡ ਦੀ ਵਰਤੋਂ ਆਮ ਹੈ, ਜਿਸ ਕਾਰਨ ਜ਼ਹਿਰਖੁਰਾਨੀ ਦੇ ਮਾਮਲੇ ਵੀ ਵੱਧ ਹਨ। ਮਾਹਿਰਾਂ ਮੁਤਾਬਕ PGIMER ਦੀ ਇਹ ਖੋਜ ਜਨਤਕ ਸਿਹਤ ਦੇ ਖੇਤਰ ਵਿੱਚ ਇੱਕ ਵੱਡਾ ਮੀਲ ਪੱਥਰ ਹੈ ਅਤੇ ਭਵਿੱਖ ਵਿੱਚ ਇਲਾਜ ਦੇ ਨਵੇਂ ਮਾਪਦੰਡ ਤੈਅ ਕਰ ਸਕਦੀ ਹੈ।