ਚਾਰ ਦਿਨਾਂ ਬਾਅਦ ਉਸੇ ਘਰ ਮੁੜ ਚੋਰੀ ਕਰਨ ਆਏ ਚੋਰ ਅੜਿਕੇ

ਮੋਹਾਲੀ, 19 ਜਨਵਰੀ  — ਮੋਹਾਲੀ ਦੇ ਸੈਕਟਰ 83ਏ ਵਿੱਚ ਏਸੀ ਯੂਨਿਟ ਤੋਂ ਤਾਂਬੇ ਦੀਆਂ ਤਾਰਾਂ ਚੋਰੀ ਕਰਨ ਦਾ ਇੱਕ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਚਾਰ ਦਿਨ ਪਹਿਲਾਂ ਚੋਰੀ ਕਰ ਚੁੱਕੇ ਚੋਰ ਦੁਬਾਰਾ ਉਸੇ ਘਰ ਵਿੱਚ ਵਾਪਸ ਆ ਗਏ, ਪਰ ਇਸ ਵਾਰ ਘਰ ਦੇ ਮਾਲਕ ਨੇ ਉਨ੍ਹਾਂ ਨੂੰ ਰੰਗੇ ਹੱਥੀਂ ਫੜ ਲਿਆ।
ਮਿਲੀ ਜਾਣਕਾਰੀ ਅਨੁਸਾਰ ਸੈਕਟਰ 83ਏ ਦੇ ਵਸਨੀਕ ਸੰਜੀਵ ਮੋਂਗਾ ਦੇ ਘਰ ਵਿੱਚ ਕੁਝ ਦਿਨ ਪਹਿਲਾਂ ਚੋਰਾਂ ਨੇ ਏਸੀ ਯੂਨਿਟ ਤੋਂ ਤਾਂਬੇ ਦੀਆਂ ਤਾਰਾਂ ਚੋਰੀ ਕਰ ਲਈਆਂ ਸਨ। ਘਟਨਾ ਵੇਲੇ ਪਰਿਵਾਰ ਘਰ ਮੌਜੂਦ ਨਹੀਂ ਸੀ। ਘਰ ਵਾਪਸੀ ’ਤੇ ਚੋਰੀ ਦਾ ਪਤਾ ਲੱਗਣ ਮਗਰੋਂ ਪੁਲਿਸ ਨੂੰ ਸੂਚਿਤ ਕੀਤਾ ਗਿਆ ਸੀ।
ਸ਼ਿਕਾਇਤਕਰਤਾ ਸੰਜੀਵ ਮੋਂਗਾ ਨੇ ਦੱਸਿਆ ਕਿ ਉਹ ਸੈਕਟਰ 66 ਵਿੱਚ ਹੋਟਲ ਚਲਾਉਂਦਾ ਹੈ। ਘਟਨਾ ਵਾਲੇ ਦਿਨ ਉਹ ਹੋਟਲ ਵਿੱਚ ਸੀ, ਜਦੋਂ ਇੱਕ ਗੁਆਂਢੀ ਨੇ ਫੋਨ ਕਰਕੇ ਦੱਸਿਆ ਕਿ ਚਾਰ ਦਿਨ ਪਹਿਲਾਂ ਚੋਰੀ ਕਰਨ ਵਾਲੇ ਚੋਰ ਮੁੜ ਘਰ ਵਿੱਚ ਦਾਖਲ ਹੋ ਗਏ ਹਨ। ਸੂਚਨਾ ਮਿਲਦੇ ਹੀ ਉਹ ਆਪਣੇ ਹੋਟਲ ਮੈਨੇਜਰ ਨਾਲ ਤੁਰੰਤ ਘਰ ਪਹੁੰਚਿਆ।
ਮੌਕੇ ’ਤੇ ਉਸਨੇ ਦੋ ਨੌਜਵਾਨਾਂ ਨੂੰ ਏਸੀ ਤੋਂ ਤਾਂਬੇ ਦੀ ਤਾਰ ਕੱਟ ਕੇ ਨੇੜਲੇ ਖਾਲੀ ਪਲਾਟ ਵਿੱਚ ਸੁੱਟਦੇ ਦੇਖਿਆ। ਮਕਾਨ ਮਾਲਕ ਨੇ ਤੁਰੰਤ ਦੋਵਾਂ ਨੂੰ ਕਾਬੂ ਕਰ ਲਿਆ, ਨੇੜਲੇ ਲੋਕ ਇਕੱਠੇ ਕੀਤੇ ਅਤੇ ਪੁਲਿਸ ਨੂੰ ਸੂਚਿਤ ਕੀਤਾ।
ਸੂਚਨਾ ਮਿਲਣ ’ਤੇ ਪੁਲਿਸ ਮੌਕੇ ’ਤੇ ਪਹੁੰਚੀ ਅਤੇ ਦੋਵਾਂ ਦੋਸ਼ੀਆਂ ਨੂੰ ਹਿਰਾਸਤ ਵਿੱਚ ਲੈ ਲਿਆ। ਮੁਲਜ਼ਮਾਂ ਦੀ ਪਛਾਣ ਅਜੇ ਕੁਮਾਰ ਅਤੇ ਰਾਹੁਲ ਕੁਮਾਰ ਵਜੋਂ ਹੋਈ ਹੈ। ਪੁਲਿਸ ਨੇ ਆਈਟੀ ਸਿਟੀ ਥਾਣੇ ਵਿੱਚ ਤਾਰਾਂ ਚੋਰੀ ਦਾ ਮਾਮਲਾ ਦਰਜ ਕਰਕੇ ਦੋਵਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।
ਪੁਲਿਸ ਅਧਿਕਾਰੀਆਂ ਮੁਤਾਬਕ ਦੋਵਾਂ ਮੁਲਜ਼ਮਾਂ ਤੋਂ ਪੁੱਛਗਿੱਛ ਜਾਰੀ ਹੈ ਤਾਂ ਜੋ ਇਹ ਪਤਾ ਲਗਾਇਆ ਜਾ ਸਕੇ ਕਿ ਉਨ੍ਹਾਂ ਨੇ ਹੋਰ ਕਿਹੜੇ ਇਲਾਕਿਆਂ ਵਿੱਚ ਅਜਿਹੀਆਂ ਵਾਰਦਾਤਾਂ ਕੀਤੀਆਂ ਹਨ। ਮਾਮਲੇ ਵਿੱਚ ਅੱਗੇ ਦੀ ਕਾਨੂੰਨੀ ਕਾਰਵਾਈ ਜਾਰੀ ਹੈ।