ਨਵੀਂ ਦਿੱਲੀ, (ਬਿਊਰੋ ਰਿਪੋਰਟ) —
ਡਾਇਰੈਕਟੋਰੇਟ ਜਨਰਲ ਆਫ਼ ਸਿਵਲ ਏਵੀਏਸ਼ਨ (DGCA) ਨੇ ਦੇਸ਼ ਦੀ ਸਭ ਤੋਂ ਵੱਡੀ ਘਰੇਲੂ ਏਅਰਲਾਈਨ ਇੰਡੀਗੋ ਖ਼ਿਲਾਫ਼ ਸਖ਼ਤ ਕਾਰਵਾਈ ਕਰਦਿਆਂ ₹22.20 ਕਰੋੜ ਦਾ ਜੁਰਮਾਨਾ ਲਗਾਇਆ ਹੈ। ਇਹ ਕਾਰਵਾਈ ਦਸੰਬਰ 2025 ਦੇ ਪਹਿਲੇ ਹਫ਼ਤੇ ਦੌਰਾਨ ਵੱਡੀ ਗਿਣਤੀ ਵਿੱਚ ਉਡਾਣਾਂ ਰੱਦ ਹੋਣ ਅਤੇ ਲਗਾਤਾਰ ਦੇਰੀ ਕਾਰਨ ਕੀਤੀ ਗਈ ਹੈ, ਜਿਸ ਨਾਲ ਲੱਖਾਂ ਯਾਤਰੀ ਪ੍ਰਭਾਵਿਤ ਹੋਏ ਸਨ।
DGCA ਦੀ ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਇੰਡੀਗੋ ਨੇ ਉਪਲਬਧ ਸੰਚਾਲਨ ਸਰੋਤਾਂ ਤੋਂ ਵੱਧ ਉਡਾਣਾਂ ਦੀ ਯੋਜਨਾ ਬਣਾਈ, ਜਿਸ ਨਾਲ ਕਰੂ ਡਿਊਟੀ ਟਾਈਮ ਲਿਮਿਟੇਸ਼ਨ (FDTL) ਨਿਯਮਾਂ ਦੀ ਉਲੰਘਣਾ ਹੋਈ। ਇਸ ਕਾਰਨ ਕਈ ਦਿਨਾਂ ਤੱਕ ਉਡਾਣ ਸਮਾਂ-ਸਾਰਣੀ ਵਿਘਨਿਤ ਰਹੀ।
ਰੈਗੂਲੇਟਰ ਅਨੁਸਾਰ, ਸਿੱਧੀ ਉਲੰਘਣਾ ਲਈ ₹1.80 ਕਰੋੜ ਅਤੇ 68 ਦਿਨਾਂ ਦੀ ਲਗਾਤਾਰ ਉਲੰਘਣਾ ਲਈ ਪ੍ਰਤੀ ਦਿਨ ₹3 ਲੱਖ ਦੇ ਹਿਸਾਬ ਨਾਲ ₹20.40 ਕਰੋੜ ਜੁਰਮਾਨਾ ਲਗਾਇਆ ਗਿਆ, ਜਿਸ ਨਾਲ ਕੁੱਲ ਰਕਮ ₹22.20 ਕਰੋੜ ਬਣੀ।
DGCA ਨੇ ਇੰਡੀਗੋ ਦੇ CEO ਨੂੰ ਸਖ਼ਤ ਚੇਤਾਵਨੀ ਜਾਰੀ ਕੀਤੀ ਹੈ ਅਤੇ ਸੰਚਾਲਨ ਲਈ ਜ਼ਿੰਮੇਵਾਰ ਇੱਕ ਸੀਨੀਅਰ ਉਪ ਪ੍ਰਧਾਨ ਨੂੰ ਅਹੁਦੇ ਤੋਂ ਹਟਾਉਣ ਦੇ ਹੁਕਮ ਦਿੱਤੇ ਹਨ। ਇਸ ਤੋਂ ਇਲਾਵਾ, ਭਵਿੱਖ ਵਿੱਚ ਨਿਯਮਾਂ ਦੀ ਪਾਲਣਾ ਯਕੀਨੀ ਬਣਾਉਣ ਲਈ ਏਅਰਲਾਈਨ ਨੂੰ ₹50 ਕਰੋੜ ਦੀ ਬੈਂਕ ਗਰੰਟੀ ਜਮ੍ਹਾ ਕਰਵਾਉਣ ਲਈ ਕਿਹਾ ਗਿਆ ਹੈ।
ਜਾਂਚ ਦੌਰਾਨ ਪਤਾ ਲੱਗਿਆ ਕਿ 3 ਤੋਂ 5 ਦਸੰਬਰ 2025 ਵਿਚਕਾਰ 2,500 ਤੋਂ ਵੱਧ ਉਡਾਣਾਂ ਰੱਦ ਹੋਈਆਂ ਅਤੇ 1,800 ਤੋਂ ਜ਼ਿਆਦਾ ਦੇਰੀ ਨਾਲ ਚੱਲੀਆਂ, ਜਿਸ ਨਾਲ ਲਗਭਗ 3 ਲੱਖ ਯਾਤਰੀ ਪ੍ਰਭਾਵਿਤ ਹੋਏ।
DGCA ਨੇ ਸਪੱਸ਼ਟ ਕੀਤਾ ਹੈ ਕਿ ਇਹ ਕਾਰਵਾਈ ਪੂਰੇ ਹਵਾਬਾਜ਼ੀ ਖੇਤਰ ਲਈ ਚੇਤਾਵਨੀ ਹੈ ਅਤੇ ਯਾਤਰੀ ਸੁਰੱਖਿਆ ਤੇ ਸਹੂਲਤਾਂ ਨਾਲ ਕਿਸੇ ਵੀ ਹਾਲਤ ਵਿੱਚ ਸਮਝੌਤਾ ਨਹੀਂ ਕੀਤਾ ਜਾਵੇਗਾ।