ਮੁੰਬਈ:ਮਹਾਰਾਸ਼ਟਰ ਦੀ ਅੰਬਰਨਾਥ ਨਗਰ ਕੌਂਸਲ ਵਿੱਚ ਹੁਣ ਜੋ ਕੁਝ ਵੀ ਵਾਪਰਿਆ ਹੈ, ਉਸ ਦੀ ਸ਼ਾਇਦ ਤੁਸੀਂ ਭਾਰਤ ਵਿੱਚ ਕਦੇ ਕਲਪਨਾ ਵੀ ਨਹੀਂ ਕਰ ਸਕਦੇ। ਪਰ ਇਸ ਨਵੇਂ ਘਟਨਾਕ੍ਰਮ ਨੇ ਸਮੁੱਚੇ ਦੇਸ਼ ਵਿੱਚ ਵੱਡੀ ਸਿਆਸੀ ਹਲਚਲ ਮਚਾ ਦਿੱਤੀ ਹੈ। ਦਰਅਸਲ, ਇਥੇ ਭਾਜਪਾ ਨੇ ਸੱਤਾ ਹਾਸਲ ਕਰਨ ਲਈ ਕਾਂਗਰਸ ਨਾਲ ਹੱਥ ਮਿਲਾ ਲਿਆ ਹੈ। ਭਾਜਪਾ ਨੇ ਸੂਬੇ ਵਿੱਚ ਭਾਈਵਾਲ਼ ਉਪ ਮੁੱਖ ਮੰਤਰੀ ਏਕਨਾਥ ਸ਼ਿੰਦੇ ਦੀ ਅਗਵਾਈ ਵਾਲੀ ਸ਼ਿਵ ਸੈਨਾ ਨੂੰ ਵੀ ਲਾਂਭੇ ਕਰ ਦਿੱਤਾ ਹੈ। ਸੱਚਮੁਚ, ਸਿਆਸਤ 'ਚ ਸਭ ਕੁਝ ਸੰਭਵ ਹੈ।
ਭਾਰਤੀ ਜਨਤਾ ਪਾਰਟੀ ਇੱਕ ਪਾਸੇ ਤਾਂ 'ਕਾਂਗਰਸ–ਮੁਕਤ ਭਾਰਤ' ਜਿਹੇ ਨਾਅਰੇ ਮਾਰਦੀ ਵਿਖਾਈ ਦਿੰਦੀ ਹੈ ਪਰ ਇਸ ਦੇ ਬਾਵਜੂਦ, ਭਾਜਪਾ ਨੇ ਆਪਣੀ ਰਵਾਇਤੀ ਵਿਰੋਧੀ ਪਾਰਟੀ ਕਾਂਗਰਸ ਨਾਲ ਗੱਠਜੋੜ ਕਰਨ ਦਾ ਫੈਸਲਾ ਕੀਤਾ। ਇਸ ਗੱਠਜੋੜ ਨੇ ਭਾਜਪਾ ਦੀ ਤੇਜਸ਼੍ਰੀ ਕਰਨਜੁਲੇ ਨੂੰ ਮੇਅਰ ਦਾ ਅਹੁਦਾ ਜਿੱਤਣ ਵਿੱਚ ਮਦਦ ਕੀਤੀ ਹੈ। ਇੱਥੇ ਇਸ ਗੱਠਜੋੜ ਨੂੰ 32 ਕੌਂਸਲਰਾਂ ਦਾ ਸਮਰਥਨ ਪ੍ਰਾਪਤ ਹੈ - 16 ਭਾਜਪਾ ਦੇ, 12 ਕਾਂਗਰਸ ਦੇ ਅਤੇ ਚਾਰ ਐਨਸੀਪੀ (ਅਜੀਤ ਪਵਾਰ ਧੜੇ) ਦੇ। ਇੰਝ ਉਨ੍ਹਾਂ ਨੂੰ ਨਗਰ ਨਿਗਮ ਵਿੱਚ ਸਪੱਸ਼ਟ ਬਹੁਮਤ ਮਿਲ਼ ਗਿਆ ਹੈ।
ਇਸ ਘਟਨਾ ਨੇ ਸ਼ਿਵ ਸੈਨਾ ਦੇ ਅੰਦਰ ਤਿੱਖੀ ਨਾਰਾਜ਼ਗੀ ਪੈਦਾ ਕਰ ਦਿੱਤੀ ਹੈ। ਇੱਕ ਅਜਿਹੀ ਪਾਰਟੀ ਜਿਸ ਨਾਲ ਭਾਜਪਾ ਮਹਾਰਾਸ਼ਟਰ ਵਿੱਚ ਸੱਤਾ ਸਾਂਝੀ ਕਰਦੀ ਹੈ, ਪਰ ਹੁਣ ਅੰਬਰਨਾਥ ਵਿੱਚ ਉਹ ਸੱਤਾ ਸਮੀਕਰਨ ਤੋਂ ਬਾਹਰ ਹੋ ਗਈ ਹੈ।
ਸ਼ਿਵ ਸੈਨਾ ਨੇ ਦੋਸ਼ ਲਾਇਆ ਹੈ ਕਿ "ਕਾਂਗਰਸ-ਮੁਕਤ ਭਾਰਤ ਦੀ ਗੱਲ ਕਰਨ ਵਾਲੀ ਪਾਰਟੀ ਹੁਣ ਕਾਂਗਰਸ ਨਾਲ ਮਿਲ਼ ਕੇ ਹੀ ਰਾਜ ਕਰ ਰਹੀ ਹੈ। ਇਹ ਸ਼ਿਵ ਸੈਨਾ ਦੀ ਪਿੱਠ ਵਿੱਚ ਛੁਰਾ ਮਾਰਨ ਤੋਂ ਇਲਾਵਾ ਕੁਝ ਨਹੀਂ ਹੈ।"
ਹਾਲਾਂਕਿ, ਭਾਜਪਾ ਨੇ ਆਲੋਚਨਾ ਨੂੰ ਖ਼ਾਰਜ ਕਰ ਦਿੱਤਾ ਹੈ, ਭਾਜਪਾ ਦੇ ਮੀਤ-ਪ੍ਰਧਾਨ ਗੁਲਾਬਰਾਓ ਕਰਨਜੁਲੇ ਪਾਟਿਲ ਨੇ ਕਿਹਾ ਕਿ ਸ਼ਿਵ ਸੈਨਾ ਨਾਲ ਗੱਠਜੋੜ ਸੱਚਮੁੱਚ ਅਪਵਿੱਤਰ ਹੁੰਦਾ।
ਪਿਛਲੇ 25 ਸਾਲਾਂ ਦੌਰਾਨ ਸ਼ਿੰਦੇ ਦੀ ਅਗਵਾਈ ਵਾਲੀ ਪਾਰਟੀ 'ਤੇ ਭ੍ਰਿਸ਼ਟਾਚਾਰ ਦਾ ਦੋਸ਼ ਲਗਾਉਂਦਿਆਂ ਪਾਟਿਲ ਨੇ ਦਾਅਵਾ ਕੀਤਾ ਕਿ ਭਾਜਪਾ ਨੇ ਅੰਬਰਨਾਥ ਵਿੱਚ ਸ਼ਿਵ ਸੈਨਾ ਨਾਲ ਇੱਕ ਵਿਸ਼ਾਲ ਗੱਠਜੋੜ ਦੀ ਖੋਜ ਕਰਨ ਲਈ ਕਈ ਕੋਸ਼ਿਸ਼ਾਂ ਕੀਤੀਆਂ ਹਨ, ਪਰ ਇਸ ਦੀ ਲੀਡਰਸ਼ਿਪ ਤੋਂ ਕੋਈ ਹਾਂ–ਪੱਖੀ ਜਵਾਬ ਨਹੀਂ ਮਿਲਿਆ।
ਜਦੋਂ ਕਿ ਭਾਜਪਾ-ਕਾਂਗਰਸ ਗੱਠਜੋੜ ਨੇ ਅੰਬਰਨਾਥ ਨਗਰ ਪ੍ਰੀਸ਼ਦ ਵਿੱਚ ਤੁਰੰਤ ਸੱਤਾ ਸੰਘਰਸ਼ ਨੂੰ ਸੁਲਝਾ ਲਿਆ ਹੈ, ਇਸ ਨੇ ਮਹਾਰਾਸ਼ਟਰ ਦੇ ਵਿਆਪਕ ਰਾਜਨੀਤਿਕ ਦ੍ਰਿਸ਼ਟੀਕੋਣ ਵਿੱਚ ਵੀ ਤਣਾਅ ਪੈਦਾ ਕਰ ਦਿੱਤਾ ਹੈ। ਇਸ ਗੱਲ 'ਤੇ ਕਿਆਸਅਰਾਈਆਂ ਵਧ ਰਹੀਆਂ ਹਨ ਅਤੇ ਬਹਿਸ ਜਾਰੀ ਹੈ ਕਿ ਕੀ ਗੱਠਜੋੜ ਇੱਕ ਸਿਆਸੀ ਜ਼ਰੂਰਤ ਨੂੰ ਦਰਸਾਉਂਦਾ ਹੈ ਜਾਂ ਇੱਕ ਵਿਵਾਦਪੂਰਨ ਸਮਝੌਤਾ।