ਮੋਹਾਲੀ / ਜਰਮਨੀ:
ਮੋਹਾਲੀ ਦੀ ਇੱਕ ਕਾਰੋਬਾਰੀ ਔਰਤ ਵੱਲੋਂ ਆਪਣੀ ਗਰਭਵਤੀ ਧੀ ਲਈ ਜਰਮਨੀ ਲੈ ਜਾਈ ਗਈ ਘਰੇਲੂ ਤੌਰ ‘ਤੇ ਤਿਆਰ ਕੀਤੀ ਪੰਜੀਰੀ ਪੂਰੇ ਪਰਿਵਾਰ ਲਈ ਮੌਤ ਦਾ ਕਾਰਨ ਬਣਨ ਵਾਲੀ ਸਾਬਤ ਹੋਈ। ਪੰਜੀਰੀ ਤੋਂ ਬਣੇ ਲੱਡੂ ਖਾਣ ਤੋਂ ਬਾਅਦ ਔਰਤ, ਉਸਦੀ ਗਰਭਵਤੀ ਧੀ ਅਤੇ ਹੋਰ ਪਰਿਵਾਰਕ ਮੈਂਬਰ ਗੰਭੀਰ ਤੌਰ ‘ਤੇ ਬਿਮਾਰ ਹੋ ਗਏ ਅਤੇ ਉਨ੍ਹਾਂ ਨੂੰ ਵੈਂਟੀਲੇਟਰ ‘ਤੇ ਰੱਖਣਾ ਪਿਆ।
ਜਰਮਨ ਪੁਲਿਸ ਦੀ ਜਾਂਚ ਵਿੱਚ ਖੁਲਾਸਾ ਹੋਇਆ ਹੈ ਕਿ ਪੰਜੀਰੀ ਵਿੱਚ ਥੈਲੀਅਮ ਨਾਮਕ ਬਹੁਤ ਹੀ ਜ਼ਹਿਰੀਲਾ ਪਦਾਰਥ ਮਿਲਿਆ ਸੀ, ਜੋ ਆਮ ਤੌਰ ‘ਤੇ ਚੂਹਾ ਮਾਰ ਦਵਾਈਆਂ ਅਤੇ ਕੀਟਨਾਸ਼ਕਾਂ ਵਿੱਚ ਵਰਤਿਆ ਜਾਂਦਾ ਹੈ। ਜ਼ਹਿਰ ਦਾ ਪਤਾ ਉਸ ਵੇਲੇ ਲੱਗਿਆ ਜਦੋਂ ਪੀੜਤ ਔਰਤ ਅਤੇ ਉਸਦੀ ਧੀ ਦੇ ਸਾਰੇ ਵਾਲ ਝੜ ਗਏ, ਜੋ ਥੈਲੀਅਮ ਜ਼ਹਿਰ ਦੀ ਇੱਕ ਪ੍ਰਮੁੱਖ ਨਿਸ਼ਾਨੀ ਮੰਨੀ ਜਾਂਦੀ ਹੈ।
ਪੀੜਤ ਦੀ ਪਛਾਣ ਰਚਨਾ ਕਪੂਰ (49) ਵਜੋਂ ਹੋਈ ਹੈ, ਜੋ ਮੋਹਾਲੀ ਦੀ ਰਹਿਣ ਵਾਲੀ ਹੈ। ਉਸਦੀ ਧੀ ਰੰਜੀਤਾ ਬੱਤਰਾ, ਜੋ ਪੇਸ਼ੇ ਤੋਂ ਵਕੀਲ ਹੈ ਅਤੇ ਵਿਆਹ ਤੋਂ ਬਾਅਦ ਜਰਮਨੀ ਵਿੱਚ ਰਹਿੰਦੀ ਹੈ, ਆਪਣੇ ਦੂਜੇ ਬੱਚੇ ਦੀ ਉਮੀਦ ਕਰ ਰਹੀ ਸੀ। ਘਟਨਾ ਦੌਰਾਨ ਨਵਜੰਮੇ ਬੱਚੇ ‘ਤੇ ਵੀ ਮਾੜਾ ਪ੍ਰਭਾਵ ਪੈਣ ਦੀ ਪੁਸ਼ਟੀ ਹੋਈ ਹੈ।
ਨੌਕਰ ‘ਤੇ ਸਮੂਹਿਕ ਕਤਲ ਦੀ ਕੋਸ਼ਿਸ਼ ਦਾ ਦੋਸ਼
ਰਚਨਾ ਕਪੂਰ ਵੱਲੋਂ ਦਰਜ ਕਰਵਾਈ ਗਈ ਪੁਲਿਸ ਸ਼ਿਕਾਇਤ ਅਨੁਸਾਰ, ਇਹ ਘਟਨਾ ਸਮੂਹਿਕ ਕਤਲ ਦੀ ਯੋਜਨਾਬੱਧ ਕੋਸ਼ਿਸ਼ ਹੋ ਸਕਦੀ ਹੈ। ਉਸਨੇ ਆਪਣੇ ਨੌਕਰ ‘ਤੇ ਸ਼ੱਕ ਜ਼ਾਹਰ ਕੀਤਾ ਹੈ, ਜੋ ਇਸ ਸਮੇਂ ਫਰਾਰ ਦੱਸਿਆ ਜਾ ਰਿਹਾ ਹੈ। ਪੁਲਿਸ ਵੱਲੋਂ ਮਾਮਲੇ ਦੀ ਗੰਭੀਰਤਾ ਨਾਲ ਜਾਂਚ ਕੀਤੀ ਜਾ ਰਹੀ ਹੈ।
ਬਾਕਸ
ਕਾਰੋਬਾਰੀ ਪਿਛੋਕੜ
ਰਚਨਾ ਕਪੂਰ ਇੱਕ ਸੈਨੇਟਰੀ ਨੈਪਕਿਨ ਬਣਾਉਣ ਵਾਲੀ ਕੰਪਨੀ ਦੀ ਮਾਲਕ ਹੈ ਅਤੇ “ਗਲੋਬਲ ਵਿਜ਼ਨ ਨੈੱਟਵਰਕ” ਨਾਮ ਦੀ ਇੱਕ ਆਈਟੀ ਕੰਪਨੀ ਵੀ ਚਲਾਉਂਦੀ ਹੈ। ਉਸਦੇ ਪਤੀ ਦਾ ਕੁਝ ਸਾਲ ਪਹਿਲਾਂ ਦੇਹਾਂਤ ਹੋ ਚੁੱਕਾ ਹੈ।
ਪੰਜੀਰੀ ਕਿੱਥੇ ਬਣੀ ਸੀ?
ਰਚਨਾ ਕਪੂਰ ਮੁਤਾਬਕ, 7 ਦਸੰਬਰ 2025 ਨੂੰ ਉਸਨੇ ਪੰਚਕੂਲਾ ਵਿੱਚ ਇੱਕ ਦੋਸਤ ਦੇ ਘਰ ਪੰਜੀਰੀ ਤਿਆਰ ਕੀਤੀ ਸੀ। ਪੰਜੀਰੀ ਨੂੰ ਤਿੰਨ ਪੈਕੇਟਾਂ ਵਿੱਚ ਪੈਕ ਕਰਕੇ ਘਰ ਦੀ ਡਾਇਨਿੰਗ ਟੇਬਲ ‘ਤੇ ਰੱਖਿਆ ਗਿਆ ਸੀ। ਬਾਅਦ ਵਿੱਚ ਇਹੀ ਪੰਜੀਰੀ 9 ਦਸੰਬਰ 2025 ਨੂੰ ਜਰਮਨੀ ਲੈ ਜਾਈ ਗਈ, ਜਿਸਦੇ ਸੇਵਨ ਨਾਲ ਇਹ ਭਿਆਨਕ ਘਟਨਾ ਵਾਪਰੀ।