ਨਵੀਂ ਦਿੱਲੀ : ਰਾਸ਼ਟਰੀ ਨਿਸ਼ਾਨੇਬਾਜ਼ੀ ਕੋਚ ਅੰਕੁਸ਼ ਭਾਰਦਵਾਜ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ। ਨੈਸ਼ਨਲ ਰਾਈਫਲ ਐਸੋਸੀਏਸ਼ਨ ਆਫ ਇੰਡੀਆ (NRAI) ਨੇ ਇਹ ਕਾਰਵਾਈ 17 ਸਾਲਾ ਮਹਿਲਾ ਨਿਸ਼ਾਨੇਬਾਜ਼ ਨਾਲ ਜਿਨਸੀ ਸ਼ੋਸ਼ਣ ਦੇ ਦੋਸ਼ਾਂ ਤੋਂ ਬਾਅਦ ਕੀਤੀ ਹੈ। ਮਹਿਲਾ ਨਿਸ਼ਾਨੇਬਾਜ਼ ਦੇ ਪਰਿਵਾਰ ਨੇ ਹਰਿਆਣਾ ਪੁਲਿਸ ਕੋਲ FIR ਦਰਜ ਕਰਵਾਈ ਸੀ।
ਨਾਬਾਲਗ਼ ਨਿਸ਼ਾਨੇਬਾਜ਼ ਨੇ ਅੰਕੁਸ਼ ਭਾਰਦਵਾਜ 'ਤੇ ਜਿਨਸੀ ਸ਼ੋਸ਼ਣ ਦੇ ਦੋਸ਼ ਲਾਏ ਹਨ। ਪੀੜਤ ਅਥਲੀਟ ਦੀ ਮਾਂ ਨੇ ਇਹ ਵੀ ਦਾਅਵਾ ਕੀਤਾ ਹੈ ਕਿ ਇੱਕ ਹੋਰ ਮਹਿਲਾ ਨਿਸ਼ਾਨੇਬਾਜ਼ ਨਾਲ ਵੀ ਅਜਿਹਾ ਹੀ ਸਲੂਕ ਹੋਇਆ ਹੈ। ਪੁਲਿਸ ਮਾਮਲੇ ਦੀ ਗੰਭੀਰਤਾ ਨਾਲ ਜਾਂਚ ਕਰ ਰਹੀ ਹੈ।
ਪੀੜਤਾ ਅਨੁਸਾਰ, ਇਹ ਘਟਨਾ ਫਰੀਦਾਬਾਦ (ਹਰਿਆਣਾ) ਦੇ ਸੂਰਜਕੁੰਡ ਇਲਾਕੇ ਦੇ ਇੱਕ ਹੋਟਲ ਵਿੱਚ ਵਾਪਰੀ। ਕੋਚ ਨੇ ਉਸ ਨੂੰ 'ਪਰਫਾਰਮੈਂਸ ਰੀਵਿਊ' ਭਾਵ ਕਾਰਗੁਜ਼ਾਰੀ ਦੀ ਸਮੀਖਿਆ ਦੇ ਬਹਾਨੇ ਹੋਟਲ ਦੇ ਕਮਰੇ ਵਿੱਚ ਸੱਦਿਆ ਸੀ। ਉਥੇ ਹੀ ਉਸ ਦਾ ਜਿਨਸੀ ਸ਼ੋਸ਼ਣ ਕੀਤਾ। ਇਸ ਘਟਨਾ ਨੇ ਖੇਡ ਜਗਤ ਨੂੰ ਸ਼ਰਮਸਾਰ ਕਰ ਦਿੱਤਾ ਹੈ।
ਅੰਕੁਸ਼ ਭਾਰਦਵਾਜ ਭਾਰਤ ਦਾ ਇੱਕ ਰਾਸ਼ਟਰੀ ਨਿਸ਼ਾਨੇਬਾਜ਼ੀ ਕੋਚ ਹੈ, ਜੋ ਮੂਲ ਰੂਪ ਵਿੱਚ ਹਰਿਆਣਾ ਦੇ ਅੰਬਾਲਾ ਦਾ ਰਹਿਣ ਵਾਲਾ ਹੈ। ਉਸ ਨੇ 2005 ਵਿੱਚ NCC ਕੈਂਪ ਤੋਂ ਨਿਸ਼ਾਨੇਬਾਜ਼ੀ ਸ਼ੁਰੂ ਕੀਤੀ। ਉਸ ਨੇ ਦੇਹਰਾਦੂਨ ਦੇ 'ਜਸਪਾਲ ਰਾਣਾ ਇੰਸਟੀਚਿਊਟ ਆਫ ਸ਼ੂਟਿੰਗ ਐਂਡ ਸਪੋਰਟਸ' ਤੋਂ ਸਿਖਲਾਈ ਲਈ। 2007 ਵਿੱਚ 'ਆਲ ਇੰਡੀਆ ਜੀਵੀ ਮਾਵਲੰਕਰ ਸ਼ੂਟਿੰਗ ਮੁਕਾਬਲੇ' ਵਿੱਚ 3 ਗੋਲਡ ਮੈਡਲ ਜਿੱਤੇ। 2008 ਵਿੱਚ ਪੁਣੇ ਰਾਸ਼ਟਰਮੰਡਲ ਯੁਵਾ ਖੇਡਾਂ ਵਿੱਚ 50 ਮੀਟਰ ਪਿਸਟਲ ਵਿੱਚ ਗੋਲਡ ਮੈਡਲ ਜਿੱਤਿਆ। 2016 ਵਿੱਚ ਜਰਮਨੀ ਦੇ ਹਨੋਵਰ ਵਿੱਚ ਭਾਰਤ ਨੂੰ ਗੋਲਡ ਜਿਤਾਉਣ ਵਿੱਚ ਮਦਦ ਕੀਤੀ।
ਅੰਕੁਸ਼ ਦਾ ਕਰੀਅਰ 2010 ਵਿੱਚ ਉਸ ਸਮੇਂ ਵੱਡੇ ਵਿਵਾਦ ਵਿੱਚ ਫਸ ਗਿਆ ਸੀ ਜਦੋਂ ਜਰਮਨੀ ਵਿੱਚ ਇੱਕ ਜੂਨੀਅਰ ਮੁਕਾਬਲੇ ਦੌਰਾਨ ਉਸਦਾ ਡੋਪ ਟੈਸਟ ਪਾਜ਼ੇਟਿਵ ਆਇਆ ਸੀ। ਉਸ ਨੇ 'ਬੀਟਾ-ਬਲੌਕਰ' ਨਾਮਕ ਪਾਬੰਦੀਸ਼ੁਦਾ ਪਦਾਰਥ ਦਾ ਸੇਵਨ ਕੀਤਾ ਸੀ, ਜਿਸ ਤੋਂ ਬਾਅਦ ਭਾਰਤੀ ਖੇਡ ਅਥਾਰਟੀ ਨੇ ਉਸ 'ਤੇ ਪਾਬੰਦੀ ਲਗਾ ਦਿੱਤੀ ਸੀ।
ਉਸ ਦਾ ਵਿਆਹ ਦੋ ਵਾਰ ਦੀ ਓਲੰਪੀਅਨ ਨਿਸ਼ਾਨੇਬਾਜ਼ ਅੰਜੁਮ ਮੌਦਗਿਲ ਨਾਲ ਹੋਇਆ ਹੈ। ਉਹ ਮੋਹਾਲੀ ਵਿੱਚ 'ਸਾਲਵੋ ਸ਼ੂਟਿੰਗ ਰੇਂਜ' ਚਲਾਉਂਦਾ ਹੈ ਅਤੇ ਨਿੱਜੀ ਕੋਚਿੰਗ ਵੀ ਦਿੰਦਾ ਹੈ।