ਸਿਡਨੀ : ਐਸ਼ੇਜ਼ ਟੈਸਟ ਮੈਚਾਂ ਦੀਲੜੀ ਦੇ ਪੰਜਵੇਂ ਅਤੇ ਆਖਰੀ ਟੈਸਟ ਵਿੱਚ ਇੰਗਲੈਂਡ ਦੇ ਸਟਾਰ ਬੱਲੇਬਾਜ਼ Joe Root ਨੇ ਸਿਡਨੀ ਕ੍ਰਿਕਟ ਗਰਾਊਂਡ ’ਤੇ ਇਤਿਹਾਸ ਰਚ ਦਿੱਤਾ। ਰੂਟ ਨੇ ਆਪਣਾ 41ਵਾਂ ਟੈਸਟ ਸੈਂਕੜਾ ਲਗਾ ਕੇ ਨਾ ਸਿਰਫ਼ ਇੰਗਲੈਂਡ ਦੀ ਪਾਰੀ ਨੂੰ ਸੰਭਾਲਿਆ, ਸਗੋਂ ਸਾਬਕਾ ਆਸਟ੍ਰੇਲੀਆਈ ਕਪਤਾਨ Ricky Ponting ਦੇ ਟੈਸਟ ਸੈਂਕੜਿਆਂ ਦੇ ਰਿਕਾਰਡ ਦੀ ਬਰਾਬਰੀ ਵੀ ਕਰ ਲਈ।
ਰੂਟ ਨੇ 146 ਗੇਂਦਾਂ ਵਿੱਚ ਸੈਂਕੜਾ ਪੂਰਾ ਕੀਤਾ ਅਤੇ ਮੁਸ਼ਕਲ ਹਾਲਾਤਾਂ ਵਿੱਚ ਇੰਗਲੈਂਡ ਦੀ ਪਾਰੀ ਨੂੰ ਐਂਕਰ ਕੀਤਾ। ਉਸਦੀ ਸੰਯਮਤ ਅਤੇ ਤਕਨੀਕੀ ਤੌਰ ’ਤੇ ਮਜ਼ਬੂਤ ਪਾਰੀ ਨੇ ਟੀਮ ਨੂੰ ਪਹਿਲੀ ਪਾਰੀ ਵਿੱਚ ਮਜ਼ਬੂਤ ਸਥਿਤੀ ਵਿੱਚ ਪਹੁੰਚਾਇਆ। ਇਹ ਐਸ਼ੇਜ਼ ਲੜੀ ਵਿੱਚ ਰੂਟ ਦਾ ਦੂਜਾ ਸੈਂਕੜਾ ਹੈ, ਜੋ ਉਸਦੀ ਲਗਾਤਾਰ ਸ਼ਾਨਦਾਰ ਫਾਰਮ ਨੂੰ ਦਰਸਾਉਂਦਾ ਹੈ।
ਇਸ ਸੈਂਕੜੇ ਨਾਲ ਜੋ ਰੂਟ ਟੈਸਟ ਕ੍ਰਿਕਟ ਵਿੱਚ ਸਭ ਤੋਂ ਵੱਧ ਸੈਂਕੜੇ ਲਗਾਉਣ ਵਾਲੇ ਬੱਲੇਬਾਜ਼ਾਂ ਦੀ ਸੂਚੀ ਵਿੱਚ ਸਾਂਝੇ ਤੀਜੇ ਸਥਾਨ ’ਤੇ ਪਹੁੰਚ ਗਿਆ ਹੈ। ਹੁਣ ਰੂਟ ਤੋਂ ਅੱਗੇ ਸਿਰਫ਼ ਦੋ ਹੀ ਮਹਾਨ ਬੱਲੇਬਾਜ਼ ਹਨ—ਦੱਖਣੀ ਅਫਰੀਕਾ ਦੇ Jacques Kallis (45 ਟੈਸਟ ਸੈਂਕੜੇ) ਅਤੇ ਭਾਰਤ ਦੇ ਮਹਾਨ ਬੱਲੇਬਾਜ਼ Sachin Tendulkar (51 ਟੈਸਟ ਸੈਂਕੜੇ)।
ਕ੍ਰਿਕਟ ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਰੂਟ ਦੀ ਤੰਦਰੁਸਤੀ, ਤਕਨੀਕੀ ਮੁਹਾਰਤ ਅਤੇ ਪਿੱਚ 'ਤੇ ਡਟੇ ਰਹਿਣ ਦੀ ਸਮਰੱਥਾ ਉਸਨੂੰ ਆਉਣ ਵਾਲੇ ਸਾਲਾਂ ਵਿੱਚ ਤੇਂਦੁਲਕਰ ਦਾ ਇਤਿਹਾਸਕ ਰਿਕਾਰਡ ਤੋੜਨ ਦਾ ਵੱਡਾ ਦਾਅਵੇਦਾਰ ਬਣਾਉਂਦੀ ਹੈ। ਇਹੀ ਨਹੀਂ 2021 ਤੋਂ ਬਾਅਦ ਟੈਸਟ ਕ੍ਰਿਕਟ ਵਿੱਚ ਰੂਟ ਦੀ ਲਗਾਤਾਰ ਸਫਲਤਾ ਉਸਨੂੰ ਆਧੁਨਿਕ ਯੁੱਗ ਦਾ ਸਭ ਤੋਂ ਭਰੋਸੇਯੋਗ ਬੱਲੇਬਾਜ਼ ਸਾਬਤ ਕਰ ਰਹੀ ਹੈ।
ਟੈਸਟ ਕ੍ਰਿਕਟ ਵਿੱਚ ਸਭ ਤੋਂ ਵੱਧ ਸੈਂਕੜੇ (ਹੁਣ ਤੱਕ)
51 – ਸਚਿਨ ਤੇਂਦੁਲਕਰ (ਭਾਰਤ)
45 – ਜੈਕ ਕੈਲਿਸ (ਦੱਖਣੀ ਅਫਰੀਕਾ)
41 – ਰਿੱਕੀ ਪੋਂਟਿੰਗ (ਆਸਟ੍ਰੇਲੀਆ)
41 – ਜੋ ਰੂਟ (ਇੰਗਲੈਂਡ)
ਦੌੜਾਂ ਦਾ ਨਵਾਂ ਰਿਕਾਰਡ :
ਜੋ ਰੂਟ ਦਾ ਇਹ ਸੈਂਕੜਾ ਸਿਰਫ਼ ਐਸ਼ੇਜ਼ ਟੈਸਟ ਲਈ ਹੀ ਨਹੀਂ, ਸਗੋਂ ਟੈਸਟ ਕ੍ਰਿਕਟ ਦੇ ਇਤਿਹਾਸ ਵਿੱਚ ਇੱਕ ਵੱਡੇ ਰਿਕਾਰਡ ਵੱਲ ਵਧਦਾ ਹੋਇਆ ਹੋਰ ਇੱਕ ਮਹੱਤਵਪੂਰਨ ਕਦਮ ਮੰਨਿਆ ਜਾ ਰਿਹਾ ਹੈ। ਇਸ ਪਾਰੀ ਤੋਂ ਬਾਅਦ, ਉਹ ਸਚਿਨ ਤੇਂਦੁਲਕਰ ਦੇ 15,921 ਦੌੜਾਂ ਦੇ ਰਿਕਾਰਡ ਤੋਂ 2,000 ਦੌੜਾਂ ਤੋਂ ਵੀ ਘੱਟ ਦੂਰ ਹੈ। ਨਵੇਂ ਪ੍ਰਾਪਤ ਵੇਰਵਿਆਂ ਅਨੁਸਾਰ ਜੋਅ ਰੂਟ ਨੇ 13 ਹਜ਼ਾਰ 937 ਦੌੜਾਂ, 51.23 ਦੀ ਔਸਤ ਨਾਲ਼ ਬਣਾਈਆਂ। ਸਚਿਨ ਤੇਂਦੁਲਕਰ ਨੇ ਹੁਣ ਤਕ 15,921 ਦੌੜਾਂ, ਔਸਤ 53.78 ਦੀ ਔਸਤ ਨਾਲ਼ ਬਣਾਈਆਂ ਹਨ। ਇਸ ਲਈ 35 ਸਾਲਾ ਰੂਟ ਦਾ ਟੈਸਟ ਕਰੀਅਰ ਹੁਣ ਇੱਕ ਇਤਿਹਾਸਕ ਮੋੜ 'ਤੇ ਜਾਪਦਾ ਹੈ।