ਚੰਡੀਗੜ੍ਹ/ਅੰਬਾਲਾ:
121 ਕਿਲੋਮੀਟਰ ਲੰਬਾ ਅੰਬਾਲਾ–ਸ਼ਾਮਲੀ ਗ੍ਰੀਨਫੀਲਡ ਐਕਸਪ੍ਰੈਸਵੇਅ ਉੱਤਰੀ ਭਾਰਤ ਦੀ ਸੜਕ ਸੰਪਰਕ ਪ੍ਰਣਾਲੀ ਨੂੰ ਨਵੀਂ ਦਿਸ਼ਾ ਦੇਣ ਲਈ ਤਿਆਰ ਹੋ ਰਿਹਾ ਹੈ। ਇਹ ਛੇ ਲੇਨ, ਵਾਲਾ ਐਕਸਪ੍ਰੈਸਵੇਅ ਅੰਬਾਲਾ ਤੋਂ ਸ਼ਾਮਲੀ ਤੱਕ ਬਣਾਇਆ ਜਾ ਰਿਹਾ ਹੈ ਅਤੇ ਸ਼ਾਮਲੀ ਨੇੜੇ Delhi–Dehradun Expressway ਨਾਲ ਸੰਪਰਕ ਪ੍ਰਦਾਨ ਕਰੇਗਾ। ਕਿਹਾ ਜਾਂ ਰਿਹਾ ਹੈ ਕਿ
ਇਸ ਮਾਰਗ ਦੇ ਮੁਕੰਮਲ ਹੋਣ ਨਾਲ ਹਰਿਆਣਾ, ਪੱਛਮੀ ਉੱਤਰ ਪ੍ਰਦੇਸ਼ ਦੇ ਨਾਲ-ਨਾਲ ਪੰਜਾਬ ਨੂੰ ਵੀ ਮਹੱਤਵਪੂਰਨ ਲਾਭ ਮਿਲੇਗਾ। ਸਰਕਾਰੀ ਅਧਿਕਾਰੀਆਂ ਮੁਤਾਬਕ, ਐਕਸਪ੍ਰੈਸਵੇਅ 2026 ਦੇ ਅੰਤ ਤੱਕ ਪੂਰਾ ਕਰਨ ਦਾ ਟੀਚਾ ਰੱਖਿਆ ਗਿਆ ਹੈ। ਇਸ ਨਾਲ ਦਿੱਲੀ ਵੱਲ ਜਾਣ ਵਾਲੀ ਆਵਾਜਾਈ ਦਾ ਦਬਾਅ ਘੱਟ ਹੋਵੇਗਾ ਅਤੇ ਉੱਤਰਾਖੰਡ ਲਈ ਇੱਕ ਤੇਜ਼ ਅਤੇ ਸੁਰੱਖਿਅਤ ਵਿਕਲਪਿਕ ਰਸਤਾ ਉਪਲਬਧ ਹੋਵੇਗਾ।
ਵੇਰਵਿਆਂ ਅਨੁਸਾਰ
121 ਕਿਲੋਮੀਟਰ ਲੰਬੇ ਅੰਬਾਲਾ-ਸ਼ਾਮਲੀ ਗ੍ਰੀਨਫੀਲਡ ਐਕਸਪ੍ਰੈਸਵੇਅ ਦੇ ਨਿਰਮਾਣ ਲਈ ਕੁੱਲ ਲਗਭਗ 893.81 ਹੈਕਟੇਅਰ (ਲਗਭਗ 2,207 ਏਕੜ) ਜ਼ਮੀਨ ਅਕਆਇਰ ਕੀਤੀ ਗਈ ਹੈ। ਲਗਭਗ 91 ਪਿੰਡ ਇਸ ਪ੍ਰੋਜੈਕਟ ਤੋਂ ਸਿੱਧੇ ਤੌਰ 'ਤੇ ਪ੍ਰਭਾਵਿਤ ਹੋਏ ਹਨ, ਜਿਸ ਵਿੱਚ ਲਗਭਗ 3,719 ਪਰਿਵਾਰ ਜ਼ਮੀਨ ਪ੍ਰਾਪਤੀ ਤੋਂ ਪ੍ਰਭਾਵਿਤ ਹੋਏ ਹਨ। ਸਬੰਧਤ ਏਜੰਸੀਆਂ ਦੇ ਅਨੁਸਾਰ, ਐਕਸਪ੍ਰੈਸਵੇਅ ਲਈ ਲੋੜੀਂਦੀ ਸਾਰੀ ਜ਼ਮੀਨ ਪ੍ਰਾਪਤੀ ਪੂਰੀ ਹੋ ਗਈ ਹੈ, ਅਤੇ ਇਸ ਵੇਲੇ ਕਿਸੇ ਵਾਧੂ ਜ਼ਮੀਨ ਪ੍ਰਾਪਤੀ ਦੀ ਲੋੜ ਨਹੀਂ ਹੈ। ਇਹ ਛੇ-ਮਾਰਗੀ, ਐਕਸੈਸ ਕੰਟਰੋਲਡ( ਹਰੇਕ ਤਰ੍ਹਾਂ ਦੇ ਵਾਹਨਾਂ ਨੂੰ ਇਥੇ ਚਲਣ ਦੀ ਇਜਾਜ਼ਤ ਨਹੀਂ ਹੋਵੇਗੀ ) ਅਤੇ ਹਰਿਆਲਾਈ ਭਰਪੂਰ ਨਿਰਧਾਰਤ ਸਮਾ- ਸੀਮਾ ਦੇ ਅੰਦਰ ਪੂਰਾ ਹੋਣ ਲਈ ਟਰੈਕ 'ਤੇ ਹੈ।
ਪੰਜਾਬ ਨੂੰ ਹੋਣਗੇ ਵੱਡੇ ਲਾਭ
ਇਸ ਐਕਸਪ੍ਰੈਸਵੇਅ ਨਾਲ ਚੰਡੀਗੜ੍ਹ, ਮੋਹਾਲੀ, ਪਟਿਆਲਾ ਅਤੇ ਲੁਧਿਆਣਾ ਵਰਗੇ ਸ਼ਹਿਰਾਂ ਦੀ ਦਿੱਲੀ ਅਤੇ ਪੱਛਮੀ ਉੱਤਰ ਪ੍ਰਦੇਸ਼ ਨਾਲ ਦੂਰੀ ਅਤੇ ਯਾਤਰਾ ਸਮਾਂ ਘਟੇਗਾ। ਕਾਰਗੋ ਅਤੇ ਢੋਆ-ਢੋਆਈ ਕਰਨ ਵਾਲੇ ਟਰੱਕਾਂ ਲਈ ਤੇਜ਼ ਰੂਟ ਮਿਲਣ ਨਾਲ ਟਰਾਂਸਪੋਰਟ ਲਾਗਤ ਘਟੇਗੀ, ਜਿਸ ਨਾਲ ਉਦਯੋਗਾਂ ਅਤੇ ਕਿਸਾਨਾਂ ਦੋਵਾਂ ਨੂੰ ਲਾਭ ਹੋਵੇਗਾ। ਖੇਤੀਬਾੜੀ ਉਤਪਾਦ ਵੱਡੀਆਂ ਮੰਡੀਆਂ ਤੱਕ ਤੇਜ਼ੀ ਨਾਲ ਪਹੁੰਚ ਸਕਣਗੇ।
ਉਦਯੋਗਿਕ ਅਤੇ ਰੀਅਲ ਅਸਟੇਟ ਨਾਲ਼ ਜੁੜੇ
ਮਾਹਿਰਾਂ ਅਨੁਸਾਰ, ਐਕਸਪ੍ਰੈਸਵੇਅ ਦੇ ਨਾਲ ਲੌਜਿਸਟਿਕਸ ਪਾਰਕ, ਗੋਦਾਮ ਅਤੇ ਛੋਟੇ ਉਦਯੋਗਿਕ ਕਲੱਸਟਰ ਵਿਕਸਤ ਹੋ ਸਕਦੇ ਹਨ, ਜਿਸ ਨਾਲ ਰੁਜ਼ਗਾਰ ਦੇ ਨਵੇਂ ਮੌਕੇ ਬਣਨਗੇ। ਰੂਟ ਨਾਲ ਲੱਗਦੇ ਖੇਤਰਾਂ ਵਿੱਚ ਜ਼ਮੀਨ ਅਤੇ ਰੀਅਲ ਅਸਟੇਟ ਦੀਆਂ ਕੀਮਤਾਂ ਵਧਣ ਦੀ ਸੰਭਾਵਨਾ ਵੀ ਜਤਾਈ ਜਾ ਰਹੀ ਹੈ।
ਦੂਜੇ ਪਾਸੇ ਵੱਡੀ ਗੱਲ ਤੇ ਚੁਣੌਤੀਆਂ
ਜ਼ਮੀਨ ਅਕੁਆਇਰ, ਕਿਸਾਨਾਂ ਨੂੰ ਮੁਆਵਜ਼ਾ, ਵਾਤਾਵਰਣ ਸੰਤੁਲਨ ਅਤੇ ਸਥਾਨਕ ਸੰਪਰਕ ਸੜਕਾਂ ਦੀ ਯੋਜਨਾ ਹਨ। ਕਿਉਂਕਿ ਐਕਸਪ੍ਰੈਸਵੇਅ ਪਹੁੰਚ-ਨਿਯੰਤਰਿਤ ਹੋਵੇਗਾ, ਇਸ ਲਈ ਪਿੰਡਾਂ ਅਤੇ ਕਸਬਿਆਂ ਲਈ ਢੁਕਵੇਂ ਇੰਟਰਚੇਂਜ ਅਤੇ ਸੇਵਾ ਸੜਕਾਂ ਦੀ ਵਿਵਸਥਾ ਕਰਨੀ ਲਾਜ਼ਮੀ ਹੋਵੇਗੀ।
ਕੀ ਬਦਲੇਗਾ ਇਹ ਐਕਸਪ੍ਰੈਸਵੇਅ
ਅੰਬਾਲਾ–ਸ਼ਾਮਲੀ ਐਕਸਪ੍ਰੈਸਵੇਅ ਨੂੰ ਸਿਰਫ਼ ਇੱਕ ਸੜਕ ਪ੍ਰੋਜੈਕਟ ਨਹੀਂ, ਸਗੋਂ ਉੱਤਰੀ ਭਾਰਤ ਦੀ ਆਰਥਿਕ ਅਤੇ ਆਵਾਜਾਈ ਰੀੜ੍ਹ ਨੂੰ ਮਜ਼ਬੂਤ ਕਰਨ ਵਾਲਾ ਮਹੱਤਵਪੂਰਨ ਪ੍ਰੋਜੈਕਟ ਮੰਨਿਆ ਜਾ ਰਿਹਾ ਹੈ। ਇਸ ਦੇ ਚਾਲੂ ਹੋਣ ਨਾਲ ਪੰਜਾਬ, ਦਿੱਲੀ, ਪੱਛਮੀ ਉੱਤਰ ਪ੍ਰਦੇਸ਼ ਅਤੇ ਉੱਤਰਾਖੰਡ ਦਰਮਿਆਨ ਯਾਤਰਾ ਹੋਰ ਤੇਜ਼ ਅਤੇ ਸੁਚਾਰੂ ਹੋਵੇਗੀ।