ਅਫਗਾਨਿਸਤਾਨ : ਤਾਲਿਬਾਨ ਨੇ ਉੱਤਰੀ ਪ੍ਰਾਂਤ ਵਿੱਚ ਸਥਿਤ ਕੁੰਦੁਜ਼ ਦੇ ਹਵਾਈ ਅੱਡੇ 'ਤੇ ਕਬਜ਼ਾ ਕਰਨ ਤੋਂ ਬਾਅਦ ਭਾਰਤ ਵਲੋਂ ਅਫਗਾਨਿਸਤਾਨ ਨੂੰ ਦਾਨ ਕੀਤੇ ਗਏ ਚਾਰ ਹਮਲਾਵਰ ਹੈਲੀਕਾਪਟਰਾਂ ਵਿੱਚੋਂ ਇੱਕ ਨੂੰ ਜ਼ਬਤ ਕਰ ਲਿਆ ਹੈ। ਦਰਅਸਲ ਭਾਰਤ ਨੇ 2019 ਵਿੱਚ ਚਾਰ ਐਮਆਈ -24 ਵੀ ਅਟੈਕ ਹੈਲੀਕਾਪਟਰ ਅਫ਼ਗਾਨ ਏਅਰ ਫੋਰਸ ਨੂੰ ਭੇਟ ਕੀਤੇ ਸਨ। ਤਾਲਿਬਾਨ ਨੇ ਬੁੱਧਵਾਰ ਨੂੰ ਕੁੰਦੂਜ਼ ਹਵਾਈ ਅੱਡੇ ‘ਤੇ ਹਮਲਾ ਕੀਤਾ। ਭਾਰਤ ਦਾ ਦਿੱਤਾ ਗਿਆ ਐਮਆਈ -24 ਹੈਲੀਕਾਪਟਰ ਵੀ ਇਸ ਹਵਾਈ ਅੱਡੇ ‘ਤੇ ਮੌਜੂਦ ਸੀ। ਹਾਲਾਂਕਿ, ਇਹ ਹੈਲੀਕਾਪਟਰ ਉਡਾਣ ਦੀ ਸਥਿਤੀ ਵਿੱਚ ਨਹੀਂ ਹੈ। ਹਮਲਾਵਰ ਹੈਲੀਕਾਪਟਰ ਕਥਿਤ ਤੌਰ ‘ਤੇ ਅਫਗਾਨਿਸਤਾਨ ਅਤੇ ਬੇਲਾਰੂਸ ਵਿਚਾਲੇ ਇਕ ਸਮਝੌਤੇ ਦੇ ਹਿੱਸੇ ਵਜੋਂ ਦਿੱਤੇ ਗਏ ਸਨ। ਅਫਗਾਨ ਸਰਕਾਰ ਦੇ ਬੁਲਾਰੇ ਮੀਰਵਾਇਜ਼ ਸਟੈਨਿਕਜ਼ਈ ਨੇ ਦੱਸਿਆ ਕਿ ਅਸੀਂ ਹਾਲੇ ਤੱਕ ਤਾਲਿਬਾਨ ਦੇ ਹੈਲੀਕਾਪਟਰ ਦੇ ਕਬਜ਼ੇ ਦੀ ਪੁਸ਼ਟੀ ਨਹੀਂ ਕਰ ਸਕਦੇ। ਅਸੀਂ ਇਸ ਬਾਰੇ ਹੋਰ ਜਾਣਕਾਰੀ ਇਕੱਠੀ ਕਰ ਰਹੇ ਹਾਂ। ਹਾਲਾਂਕਿ, ਉਸ ਨੇ ਹੈਲੀਕਾਪਟਰ ਉੱਤੇ ਕਬਜ਼ਾ ਕਰਨ ਦੇ ਤਾਲਿਬਾਨ ਦੇ ਦਾਅਵੇ ਨੂੰ ਖਾਰਜ ਨਹੀਂ ਕੀਤਾ ਹੈ।